Tíminn sem tekur að falsa kvittanir

Hvað er liðið langt frá þvi að fréttin birtist um lánamál Samson? Er þetta sem sagt tíminn sem tekur að falsa kvittanir og greiða öllum tengdum aðilum nóg til að ljúga um að lánið hafi verið greitt að fullu og annað jafn stórt hafi verið tekið strax aftur?

Þetta heldur ekki miklu vatni.

kv,

Samson greiddi lánið árið 2005

Höfuðkreppa

Glöggt er gests augað.

90% af þessari kreppu er í hausnum á okkur. Við erum öll svo upptekin af því að vorkenna sjálfum okkur og kenna öðrum um að við föttum ekki að lífið er alls ekki svo slæmt. 

Jú atvinnuleysi hefur aukist, það kom verðbólguskot, fasteignamarkaðurinn settist á rassinn og ýmislegt. EN, eins og Sölvi sagði um daginn, það hefur enginn farist úr hungri og fólk virðist almennt hafa það gott. 

Við þurfum að draga hausinn upp úr holunni og sparka í rassgatið á sjálfum okkur og hætta þessu kreppuvæli. 

Staðan á Íslandi er svipuð og hún hefur verið á Spáni undanfarin 10 árin, staðan er svipuð og á Bretlandi núna, við erum betur sett en Grikkir, og ég er ekki einusinni kominn út fyrir evrópu...

Núna ætla ég að fara út í sjoppu og kaupa mér eitthvað sem ég þarf ekki á að halda til að auka landsframleiðslu og stuðla þannig að uppbyggingu sem allir virðast bíða eftir en enginn þorir að byrja á.

kveðja að handan

ÓS

 

Lítil ummerki um erfiðleika

Reynsla annarra þjóða.

Ætla að leyfa mér að vísa í þessa frétt sem birtist nýlega á Pressunni.

Ég nefnilega get ekki séð hvernig er hægt að veita einhverjum stöðu vegna þess af hvaða kyni hann er, í nafni jafnréttis kynjanna. Ég bara fæ það ekki til að ganga upp.

M.b.k.

Sá gamli

Kynjakvóti í stjórnum fyrirtækja

Við megum ekki gleyma hruninu

Við megum ekki gleyma að hér varð algert hrun. Hér hrundi allt. Enginn hefur farið varhluta af þessu fjármálaóveðri. Frjálshyggjan er hrunin, mikill forsendubrestur á samfélaginu, gjaldþrota hugmyndafræði kúlubréfamanna tilheyrir fortíðinni.

Það þarf að taka til eftir óhefta frjálshyggju sem hrundi hér ofan á okkur og skilur samfélagið eftir í rúst. Rjúkandi rústir. Við þurfum að byggja hér upp norrænt velferðarsamfélag, kynjuð ríkisstjórn! Siðblindan var alger, samfélagslega ábyrgð strax !

Við þurfum algera hreinsun, endurnýjun, endurmeta gildi og búa umgjörð fyrir nýtt upphaf og endurreisn! Við þurfum samfélag sem byggir á jöfnuði, siðbót. Félagslegur jöfnuður réttlæti og auðmýkt! Egill Helga og Lára Hanna eru einu bloggararnir sem eru að segja eitthvað af viti.

Egil Helgason sem forseta !

Ísland á leið í ruslflokk

Hagar og Samskip

Mér þykir sérstaklega skrítið hvað er stanslaust talað um að fyrirtækjum hafi verið ,,úthlutað" til fyrri eigenda. Það er eins og Arion hafi ákveðið að færa þeim fyrirtækin í jólagjöf. Það viðist samt ekki vera alveg málið. Það versta við þetta er að stjórnarþingmenn sem eiga að hafa puttan á púslinum á viðskiptalífi landsins virðast sumir ekki hafa hugmynd um hvað hefur verið gert í málefnum sumra fyrirtækja.

Hagar voru teknir af fyrri eigendum þvert á áætlanir þeirra að greiða upp allar skuldir tengdar eingnarhaldi sínu. Gott og vel, bankinn hefur séð sér betri hag (hjehje) í því að selja Haga á opnum markaði. Þetta er einnig það sem almenningur kallaði eftir. En svo varð allt vitlaust þegar stjórnendum Haga var boðið að kaupa 15% í fyrirtækinu við skráningu. Mér sýnist ekki vera að færa neinum fyrirtækið heldur fá stjórnendur tækifæri til að kaupa minnihlut í fyrirtæki sem þeir starfa hjá sem gæfi þeim hvata til að standa sig vel í starfi og hafa hag fyrirtækisins í fyrirrúmi í ákvarðanatöku. En það er auðvitað hægt að skilja gremju manna sem hafa ekki forkaupsrétt. Fyrir þá eru alltaf hin 85% fyrirtækisins til sölu og jafnvel meira ef stjórnendur nýta ekki rétt sinn.

Á sama hátt hefur Arionbanki verið sakaður um að ,,færa" eigendum Samskipa fyrirtækið á fati. En eftir því sem ég best kemst að þá skiptu Samskip aldrei um eigendur. Fyrirtækið var endurskipulagt og eigendur (þeir sömu og hafa verið síðustu árin) juku hlutafé fyrirtækisins um 700 milljónir til að greiða niður skuldir og bæta tryggingar lánveitenda. Það að Samskip hafi verið úthlutað til fyrri eigenda er eins og að segja að ég hafi fengið íbúðina mína á 500.000kr því ég greiddi niður íbúðarlánið um sem því nemur.

Gremja fólks er skiljanleg en persónulega þykir mér óþarfi að þingmenn dæli rangfærsluolíu á eldinn til þess eins að safna vinsældarstigum.

mbk, 

ÓS

Vill heimila eignaupptöku

Egill Helga og ritskoðun hans á blogginu.

Egill Helga er farinn að efast um umræðukerfið á blogginu sínu, ekki er ég hissa á því.

En það sem ég hins vegar staldra við eru lýsingar hans á þeirri ritskoðun sem hann segist stunda. Orðrétt segir hann: "Vinsa út ritsóða, nettröll, þá sem eru augljóslega haldnir þráhyggjum, þá sem reyna að rugla umræðuna að rugla umræðuna, þá sem skrifa undir mörgum netföngum."

Nú hef ég ekki oft blandað mér í umræðuna þarna, þau eru sjálfsagt teljandi á fingrum annarrar handar skiptin sem ég hef gert það og þá alltaf sem Þórður Ingi, sem er mitt nafn. 

En þann 12. desember síðastliðinn ákvað ég að taka þátt í umræðu við færslu sem snérist um gjörðir seðlabanka dagana fyrir hrun. Þar sagðist ég þreyttur á eftiráspekingum sem koma nú fram og segja hvernig hlutirnir hefðu átt að vera unnir en þögðu eigi að síður þunnu hljóði á meðan mesti hasarinn gekk yfir. Ég var þó kurteis og gætti hófs í orðavali.

Ekki misskilja mig, það er alltaf gott að fá greiningu á því sem hérna gerðist, en fjöldi eftiráspekinga sem láta eins og þeir hafi alla tíð vitað betur en þeir sem réðu hér fyrir rúmu ári er orðinn fullmikill fyrir minn smekk.

Nema hvað að örskömmu síðar sá ég að athugasemd mín var horfin, prófaði ég þá að spyrja Egil að þessu og taka skjámynd. Hér sést athugasemd mín í réttu samhengi:

Þið getið smellt á myndina til að fá skýrari mynd.

Ég læt ykkur eftir um að dæma hvort ég hafi gengið yfir strikið með þessari athugasemd, en klárlega fannst Agli það því skömmu síðar var staðan svona:

 

Það virðist því vera að þessi óskaplegi samhljómur sem birtist í athugasemdakerfi Egils Helga sé engin tilviljun og ritskoðun hans snúist fyrst og fremst um afstöðunni sem felst í athugasemdinni, ekki orðalagi eða kurteisi.

Það verður svo hver að gera upp við sig hvað honum finnst um að maður með svo sterkar skoðanir skuli vera þungavigtarmaður í stjórnmálaumræðu í ríkissjónvarpinu. Mér gæti ekki verið meira sama ef hann starfaði á einkarekinni stöð.

En Egill Helga starfar á ríkisfjölmiðli. Ríkissjónvarpið gefur sig út fyrir að þjóna hagsmunum eigenda sinna, s.s. okkar allra en ég skynja eftir sem áður vissa bjögun þegar kemur að stjórnmálaumræðu.

M.b.k.

Sá gamli

Bjöguð sýndarkosning

Það er erfitt að taka mark á þessari kosningu. Kosningar á við þessa hafa alltaf innbyggða bjögun. Ég skal útskýra.

Það liggur í augum uppi að þeir sem eru hitamenn í þessu málefni flokkast í svona skoðanakannanir. Þeim sem er mikið niðri fyrir og hafa sterkar skoðanir á þessu máli fara því frekar í gegnum ferlið sem þarf til að koma atkvæði sínu á framfæri. Þannig að þeir 10% reiðustu fara í netbankana sína og kjósa. Hinum sem eru ekki eins mikið niðri fyrir (eða ekki eins miklir áhugamenn um þjóðmál) fara frekar á Leikjanet eða í bíó.

Þess vegna er svona skoðanakönnun ekki þversnið af þjóðinni og sýnir því ekki vilja þjóðarinnar sem heildar, heldur vilja þeirra sem heimsækja Eyjuna, nenna að skrá sig og kjósa. Óbjöguðustu skoðanakannanir sem hægt er að gera fela í sér úthringingar í fólk að handahófi úr þjóðskrá, þannig er náð (gefið að flestir eigi síma) sem bestu úrtaki. Skekkjumörkin eru það mikil að líklegt er að það sé ekki nærri svo mikill munur á já og nei. Líklegt er að fleiri myndu segja já en þetta er ekki eins afgerandi og ætla mætti.

Að lokum væri gaman að velta fyrir sér hverjar niðurstöðurnar ef kosningin hefði farið fram á Pressunni eða AMX já eða M5 - ætli sama niðurstaða hefði fengist?

kv,

ÓS

70% vilja hafna Icesave

Skerðing á samningsfrelsi

Þessi dásamlega ríkisstjórn ætlar að skerða samningsfrelsi einstaklinga og handstýra verðmyndun á ákveðnum fjármálagerningum en ekki öðrum. Einstaklega athyglisverður leikur í kjölfar skattahækkana og fleiri bremsuaðgerða.

Með því að banna lánveitingar sem eru eingöngu með veði í hlutabréfum er verið að draga hressilega úr eftirspurn eftir hlutabréfum, einmitt það sem við viljum þegar enginn vill eiga hlutabréf og allir halda sig við bankainnistæður með atvinnulífið fast í handbremsu.

Það að lána með veði í hlutabréfum er alls ekki siðlaust, hreinlega er það mjög eðlilegt. Hinsvegar má setja spurningarmerki við veðHLUTFÖLL, en það er annað mál. Aliber sér ekkert að því að lána (tökum dæmi) 50kr með veði í 100kr hlutabréfum. Einnig mætti setja spuringarmerki við að bankar láni til kaupa í sjálfum sér, en það er óskylt veðinu sjálfu.

Oft þegar fyrirtæki taka lán þá eru skilmálar í lánasamning að bankinn geti breytt skuldinni í hlutafé á fyrirfram ákveðnu verði, þetta er gert til að fá betri lánakjör og auka öryggi bankans. Enginn beinn munur er á þessu og að lána með veði í hlutabréfum, annar en að nafninu til. Merkileg mismunun og mun valda kostnaðarsamri og óþarfri skipulagningu á mörgum fyrirtækjum (og þá er ég ekki bara að tala um skúffu-kúlubréfa-hneykslis-kennitölur).

Það að seta þök á bónusa og laun er einnig hrikalega barnalegt. Afhverju í fjáranum ætti ríkið að vilja setja þak á tekjur sínar? Við munum öll eftir því að það eru skattar í þessu landi, og þeir sem hæstu launin hafa greiða mesta skatta. Hví ekki að leyfa fólki að hafa há laun og borga skattana sína? 

Ef banki telur starfsmann vera það verðmætan að honum beri há laun þá ætti hann að sjálfsögðu að fá þau, ellegar fær þessi starfsmaður líklega vinnu erlendis og hættir að greiða til samfélagsins. Það að hafa hámarkslaun og bónusa er eins og að banna fólki að stunda nám lengur en 14 ár af ævinni - það væri hreinlega ósiðlegt og óæskilegt að leyfa fólki að vita meira (úbs engir læknar).

Fáránlegt.

kv,

ÓS

Koma í veg fyrir ofurlaun

Hvað á þetta að þýða Hermann?

Ja nú er Aliber hissa. Fyrirtæki í rekstri á kreppuklakanum sem skilar hagnaði. Þetta eru fréttir til næsta bæjar og jafnvel lengra. Maður hélt að það væri ekki hægt að reka fyrirtæki yfir núllinu í þessu árferði, það væri tilgangslaust að einusinni reyna.

Það eina sem kemur til greina er að það sé verið að svindla á neytendum með því að rukka himinhátt verð fyrir eldsneyti og þjónustu. T.d. hef ég heyrt að súkkulaðistykki hjá NEinum séu allt að 4% dýrari en á sambærilegum stöðum. 

Það er algerlega ósiðlegt að skila hagnaði þegar fólk er að missa vinnuna hér og þar í samfélaginu vegna tapreksturs og lélegra stjórnunarhátta í öðrum fyrirtækjum. N1, við fólkið, krefjumst þess að þið látið reksturinn ganga verr til að hækka almenningsálitið. Óþarfi er að ráða nýtt starfsfólk eða þess háttar enda líður flestum vel á atvinnuleysisbótum.

Ef þið hættið þessu ekki, þá neyðumst við til að hringja í Skattgrím J og láta hann leggja enn einn skattinn á ykkur til að berja niður þennan hagnað.

over and out

Hagnaður hjá N1

Frábærar fréttir af Arion

Fyrstu góðu fréttirnar í langan tíma af efnahagsmálum landsins. Nú verða starfræktir tveir bankar sem eru ekki í rekstri ríkisins og lausir undan fingrum stjórnmálamanna í stjórnarskipanir og stjórnarhætti. Maður var farinn að hafa áhyggjur af því að reka ætti íslenska banka eins og stjórnmálaflokka eða góðgerðarbatterí á kostnað almennings.

Nú verða eflaust gerðar breytingar á rekstri í kjölfar nýs eignarhalds og ákvarðanir teknar á forsendum viðskipta en ekki geðþótta og skyldurækni við stjórnmálamenn.

Aðal gleðiefnið er að við fáum u.þ.b. 40 þúsund milljónir til baka til ríkisinssem hægt er að nota í önnur og þarfari verk en að  reka banka illa.

bestu kveðjur,

ÓS

Kröfuhafar eignast Arion