Úthugsað

 Já þetta er bara góð hugmynd hjá Margréti. Ef til vill mætti bæta um betur og afnema allri leynd á Íslandi. Fysta leyndarmálalausa samfélagið. Væri ekki tilvalið að byrja á því að skrá niður hvaða flokka þegnar landsins kjósa. Svona til öryggis ef svo kæmi upp að það hafi verið rangt að kjósa einhvern flokk? Svo er alger óþarfi að láta lækna hafa þagnarskyldu gagnvart sjúklingum sínum, er það ekki okkar réttur að vita hvort nágranninn hafi lekanda eða krabbamein? Við verðum að fá að vita hvort nágranninn hafi lifað lífinu á réttan hátt. Einnig væri réttast að opinbera einkunnir nemenda svo allir viti hvernig nágrannanum hafi gengið í námi, við eigum rétt á að vita hvort maðurinn á efri hæðinni hafi stundað námið af krafti eða eytt tímanum í vitleysu. 

Fyrst verið er að passa upp á þegnana er þá ekki tilvalið að taka upp öll símtöl á Íslandi, til öryggis, ef einhver brýtur af sér já eða ef fyrirtæki fer á hausinn. Þá er hægt að rekja allar ákvarðanir og stinga ábyrgum í fangelsi á meðan hlustað er á öll símtöl viðkomandi, stjórnmálaskoðanir, sálfræðiskýrslur, innistæða bankareikninga og laun viðkomandi eru skoðuð og opinberuð.

Margrét mín, þetta er dásamleg hugmynd. Þú mátt byrja á mér. Hafðu samband og þú mátt skoða bankayfirlitið mitt og skoða internetsöguna í tölvunni minni.  Þangað til væri sniðugt að hafa samband ið kínverska sendiráðið og biðja þá um að aðstoða við verklagsreglur varðandi eftirlit og ritskoðun.

 

kveðja.

Bankaleyndina burt