Blogghamfarirnar.

Grunaði það. Bloggarar fara mikinn og vilja meina að hann sé að segja að fólk eigi að hafa hljótt. Ég að vísu hlustaði á það sem hann sagði og heyrði ekkert um það. Heyrði hann bara tala um að þetta mætti ekki leysast upp í skemmdarverk og ofbeldi. Og þar er ég sammála honum, þó ég sé alls ekki sjálfstæðismaður og hafi ekki kosið þann flokk í síðustu alþingiskosningum.

Ákveðin tegund mótmæla er að mínum dómi farin að þvælast fyrir. Aðgerðir, lausnir, innihald ræða og önnur efnisleg umfjöllun víkur fyrir fréttum af eggjagrýtingum og skemmdarverkum. Sumir vilja kenna fjölmiðlum um og þeir eiga vissa sök, þeir velja umfjöllunarefni og hversu stóran sess það skipar en eiga þeir sem láta svona ekki einhverja sök líka?

Í gær var fyrsti des. Þrátt fyrir útifund og ræðuhöld var aðalfréttaumfjöllunin um liðið sem þusti inn í Seðlabankann. Maður þarf að leggja sig eftir því að finna ræðurnar og umfjöllun um þær.

Spilling er nýja tískuorðið. Það eru víst allir spilltir sem hafa farið með einhver völd síðustu ár og þarf að skipta þeim öllum út. Sekir uns sakleysi er sannað, og í burtu með þá áður en sakleysið er sannað. Breytum breytinganna vegna, þá verður allt gott.

Árni minnist á verðbólguna og ástæðu hennar og fer að hluta til með rétt mál, gott hjá dýralækninum. En hann minnist ekki á breytingar á vísitöluútreikningum. Neyslukarfan hefur breyst, útgjöld þjóðarinnar þurfa að endurspeglast í vísitölunni og þau gera það ekki miðað við núverandi forsendur útreikninganna. En gengismál eru gríðarlega mikilvæg núna. Það verður að fá gjaldeyrisviðskipti í fullan gang aftur og ná jafnvægi á genginu. Orðið "haft" í haftastefnunni tekur á sig tvöfalda merkingu því ekki aðeins er verið að hefta gjaldeyrisviðskiptin heldur er einnig verið að koma í veg fyrir að jafnvægi náist. Höft eru á lausninni.

Sá gamli.

Þarf að stilla mótmælum í hóf

Athugasemdir

[Skaz, 2.12.2008 kl. 18:08]

Það er nú bara þannig að þegar ekki er hlustað á mótmæli þá eiga þau það til að verða háværari og róttækari. Og miðað við langlundargeðið hjá Íslendingum hingað til þá verða þetta að teljast til róttækari mótmæla hér á landi.

Og það er ekki hlustað, þannig að líklega gæti verið að fólk fari bara að hafa hærra?

Vissulega var hann ekki að segja fólki að hætta að mótmæla en talsmátinn hjá honum var á þann veg að það væri allt í lagi að mótmæla en hann sæi enga ástæðu til þess að taka nokkuð mark á því.

Það er bara hreinn hálfvitaskapur að ögra mjög reiðu fólki í fjárhags og atvinnuvandræðum, hópur sem á bara eftir að stækka. Þannig að á vissann hátt er Árni bara að bjóða upp á meiri vandræði.